ಇತ್ತೀಚೆಗಷ್ಟೆ ಓದಿ ಮುಗಿಸಿದ ' ಪ್ರೇಮಾ ಕಾರಂತ'ರ ಆತ್ಮಕಥೆ ' ಸೋಲಿಸಬೇಡ ಗೆಲಿಸಯ್ಯಾ' ರೋಮಾಂಚನಕಾರಿ ಪಯಣವಲ್ಲದೆ ಮನಸ ಕೊಳದೊಳಗೆ ಕಲ್ಲೆಸೆದಂತೆ ಅಲೆಗಳೆಬ್ಬಿಸುತ್ತಲೇ ಇತ್ತು.
ತಮ್ ಜೀವನ ಪಯಣದ ಅತ್ಯಂತ ವಿವಾದಾತ್ಮಕ ಘಟನೆಯಾದ ಕಾರಂತ ವಿಭಾ ಮಿಶ್ರ ಪ್ರಕರಣದಿಂದ ಕಥನ ಶುರು ಮಾಡುವ ಪ್ರೇಮಾ ಕಾರಂತರು ಇಡೀ ಪಯಣವನ್ನ ಹಿಮ್ಮುಖ ಮುಮ್ಮುಖವಾಗಿ ಸಾಗಿಸುವ ರೀತಿಯೇ ಅದಭುತ. ತನ್ನ ಓಡಾಟಗಳು, ನಾಟಕಗಳು, ವಿವಾದಗಳು, ಫಣಿಯಮ್ಮ ಚಲನಚಿತ್ರ ಮೂಡಿದ ಬಗೆ, ಸಂಕಷ್ಟದ , ಖುಷಿಯ(?) ಕಾಲ ಹೀಗೆ ವಿವರಗಳು ಕಣ್ಣಿಗೆ ಕಟ್ಟುವಂತೆ ನಿರೂಪಿಸುತ್ತಾ ಹೋಗುತ್ತಾರೆ.
ಆದರೆ ಕೆಲ ಪ್ರಶ್ನೆಗಳು ಉದಾಹರಣೆಗೆ ಇಡೀ ಕಥನದಲ್ಲಿ ಎಲ್ಲಿಯೂ ಸಂತಾನದ ಬಗ್ಗೆ, ಆ ಆಸೆಯ ಬಗ್ಗೆ ಹಾಗೆ ನಮ್ಮಂತಹ ಸಾಮಾನ್ಯರಿಗೆ ಮಹತ್ವದ್ದು ಅನಿಸಬಹುದಾದ ಸಂಗತಿಗಳ ಪ್ರಸ್ತಾವವೂ ಆಗುವುದಿಲ್ಲ; ಆ ಮಟ್ಟಿಗೆ ಇದೊಂಥರಾ ಸಾರ್ವಜನಿಕ ಕಥನವಾಗುತ್ತದೆ.
ಇನ್ನು ಅವರ ಆತ್ಮಕಥೆಯಾಗಿರುವುದರಿಂದ ಅವರ ನಿಲುವುಗಳು ಢಾಳಾಗೇ ಕಾಣುತ್ತವೆ ನಮಗೆ ಒಪ್ಪಿಗೆಯಾಗದಿದ್ದರೂ.
ಹಾಗೆಯೇ ಇದು ಆ ಕಾಲದ ಸಾಂಸ್ಕ್ರತಿಕ ಪಲ್ಲಟಗಳ ದಾಖಲೆ ಕೂಡಾ,
ಪುಸ್ತಕ ಓದಿ ಮುಗಿಸಿದರೂ ಪ್ರೇಮಾ ಕಾರಂತರು ಕಾಡುತ್ತಾರೆ ಮತ್ತು ಆ ಮೂಲಕ ಗೆಲ್ಲುತ್ತಾರೆ!
