ಬರೆಯಲಾರದ ಕಷ್ಟ

ಬಸ್ಸಲ್ಲಿ  ಹೀಗೆ ಕಿಟಕಿಗೆ ತಲೆಯಾನಿಸಿಕೊಂಡು ಹೊರಗೆ ನೋಡುತ್ತಾ ನಿದ್ದೆಗೆ ಜಾರುವಾಗ ಎಂದೂ ಬರೆಯಲಾಗದ ಕತೆಯ ಸಾಲುಗಳು ಒತ್ತರಿಸಿ ಬರುತ್ತವೆ. ಅದನ್ನೇ ಟೈಪಿಸಲೋ ಬರೆಯಲೋ ಹೊರಟರೆ ದಿಕ್ಕಾಪಾಲಾಗಿ ಓಡುತ್ತವೆ. ಬಹುಶಃ ಅದು ಬೇಡುವ ಅನುಭವದ ದ್ರವ್ಯಕ್ಕೂ, ತಾಳ್ಮೆಗೂ ನಾನಿನ್ನೂ ಬಲಿತಿಲ್ಲ ಅಂತ ಸುಳ್ಳೇ ಸಮಾಧಾನ!
ನೆನಪು ಹಿಂಜಿ ಹತ್ತಿಯಂತೆ ತೆಳುವಾದರೂ ಮತ್ತೆ ಮತ್ತೆ ಅದೇ ಓಣಿಗಳಲ್ಲಿ ನುಗ್ಗುವ ಮನಸಿನ ಧಾವಂತದ ಅರ್ಥವೇನು ಅಂತ ಗೊತ್ತಿಲ್ಲ. ' ನಾನು ಚಿಕ್ಕೋನಿದ್ದಾಗ ' ಅಂತ ಶುರುವಾಗುವ ಎಲ್ಲ ಕತೆಗಳೂ ಮತ್ತದೇ ಕ್ಲೀಷೆಯಾಗಿ ಹೇಳುವವನಿಗೇ ಬೇಸರವಾಗಿಬಿಡುತ್ತದೆ. ಹೊಸ ಅನುಭವಗಳಿಗೆ ತೆರೆದುಕೊಳ್ಳಲು 'ಕಂಫರ್ಟ್ ಝೋನ್' ಬಿಟ್ಟು ಬರುವ, ಉದಾಸೀನದ ಮೂಟೆಯ ಇಳಿಸುವ ಅನಿವಾರ್ಯತೆ ಇರುವ ಕಾರಣ ಅದು ರಿಸ್ಕ್.
ಹೀಗೆ ಯಾವತ್ತಾದರು ಲಹರಿಯ ಗುಂಗಲ್ಲಿ ಬಂದಷ್ಟು  ಬರೆದರೆ ಬರೆಯಲು ಸುಲಭದಲ್ಲಿ ಸಿಕ್ಕಿದರೇ ಅದೇ ಪುಣ್ಯ, ನಡು ನಡುವೆ ಈಗಿನ ಗೀಚುವಿಕೆ ಮುಂದೆಂದೋ ಯಾಕಪ್ಪಾ ಬರೆದೆ ಎಂಬ ಹಳಹಳಕೆಯಾಗಬಾರದು ಅಂತಲೇ ಡಿಲೀಟಾಗಿ ಹೋಗುತ್ತೆ.
ಒಂದಿಷ್ಟು ಹಾರ್ಮೋನುಗಳ ಆಟಾಟೋಪಕ್ಕೆ ಏನೆಲ್ಲ ಸಹಿಸಬೇಕು ಅಂದರೇ ದಿಗಿಲಾಗುತ್ತೆ!

ಅನುವಾದಗಳ ಕತೆ!

ನಮ್ಮ ಕನ್ನಡ ಸಾಹಿತ್ಯದ ದುರಂತ ಎಂದರೆ ಹೊಸತಕ್ಕೆ ತೆರೆದುಕೊಳ್ಳದಿರುವುದು ಮತ್ತು ಮಾಹಿತಿಯ ಕೊರತೆ. ಇಡೀ ಜಗತ್ತೇ ಬರಿದೆ ಪುಸ್ತಕಗಳ ಬಿಟ್ಟು ಕಡಿಮೆ ಅವಧಿಯಲ್ಲಿ ತಲುಪುವ, ಕಡಿಮೆ ಜಾಗ ಹೊಂದುವ ಇ ಬುಕ್ ಗಳಿಗೆ ಬದಲಾಗುತ್ತಿರುವ ಗಳಿಗೆಯಲ್ಲಿ ನಾವು ಇನ್ನೂ ಅಪ್ ಡೇಟ್ ಆಗೇ ಇಲ್ಲ. ಸರಿಯಾಗಿ ಹುಡುಕಿದರೆ ಕೆಲವು ನೂರು ಕನ್ನಡ ಪುಸ್ತಕಗಳು ಸಿಗಬಹುದು ಅಷ್ಟೇ! ಡಿಜಿಟಲ್ ಲೈಬ್ರರಿ ಆಫ಼್ ಇಂಡಿಯದಲ್ಲಿ ಹುಡುಕಿದರೆ ಅದೇ ಸಹ್ರಸನಾಮಾವಳಿಗಳು ಇತ್ಯಾದಿಗಳ ಸಾಲೇ ಇವೆ. ಅವೂ ಹಳೆಯ ಓಬೀರಾಯನ ಕಾಲದವು! ವಸುಧೇಂದ್ರರ ಎರಡೋ ಮೂರೋ ಪುಸ್ತಕ ಬಂದದ್ದು ಬಿಟ್ಟರೆ ಮತ್ತೆಲ್ಲ ಹವ್ಯಾಸಿಗಳ ಪ್ರಯತ್ನವೇ!
ಇನ್ನು , ಮಾಹಿತಿಯ ಬಗ್ಗೆ ನಮಗೆ ಜಗತ್ತಿನ ಅದ್ಭುತ ಕೃತಿಗಳನ್ನೆಲ್ಲ ಅವವೇ ಭಾಷೆಯಲ್ಲಿ ಓದುವುದು ಕಷ್ಟವೇ; ಹಾಗಂತ ಕನ್ನಡ ಅನುವಾದಗಳ ಮಾಹಿತಿಯೂ ಇರುವುದಿಲ್ಲ, (ಹೊಸತು ಅಂತ ಒಂದು ಪೇಪರ್ ಬರುತ್ತೆ ಆದರೆ ಅದರ ವಿಸ್ತಾರ ಅಷ್ಟಾಗಿಲ್ಲ) ನನಗೀಗಲೂ

ನೆನಪಿದೆ. ಕೆಲ ವರ್ಷಗಳ ಹಿಂದೆ ಯಾವುದೋ ಪುಸ್ತಕ ಪ್ರದರ್ಶನದಲ್ಲಿ ಯಾವುದೋ ಪುಸ್ತಕ ಹುಡುಕುತ್ತಿದ್ದವನಿಗೆ ಅಕಸ್ಮಾತ್ ಎಂಬಂತೆ ಪ್ರಸನ್ನ ಅವರ ಮಾರ್ಕ್ವೇಝ್ ಕಾದಂಬರಿ ವನ್ ಹಂಡ್ರೆಡ್ ಇಯರ್ಸ್ ಆಫ಼್ ಸಾಲಿಟ್ಯೂಡ್ ನ ಅನುವಾದ ಒಂದು ನೂರು ವರ್ಷಗಳ ಏಕಾಂತ ಕಣ್ಣಿಗೆ ಬಿದ್ದು ಆದ ಖುಷಿ(ಅದನ್ನ ಇಂಗ್ಲೀಷಲ್ಲಿ ಓದಿ ಆಗ ನಾನ್ಯಾಕೆ ಖುಷಿ ಪಟ್ಟೆ ಅಂತ ಅರ್ಥ ಆಗುತ್ತೆ) .ಹಾಗೆ ಪ್ರೈಡ್ ಯಂಡ್ ಪ್ರಿಜ್ಯುಡೀಸ್ ದೇಜಗೌ ಅವರು ಹಮ್ಮು ಬಿಮ್ಮು ಅಂತ, ಕ್ರಾನಿಕಲ್ಸ್ ಆಫ಼್ ಎ ಡೆತ್ ಫ಼ೋರ್ ಟೋಲ್ಡ್ ಎಲ್.ಎಸ್. ಶೇಷಗಿರಿರಾಯರು ಒಂದು ಸಾವಿನ ವೃತ್ತಾಂತ ಅಂತ, ಲವ್ ಇನ್ ದ ಟೈಮ್ ಆಫ಼್ ಕಾಲರಾ ವನ್ನ ರವಿ ಬೆಳಗೆರೆ ಮಾಂಡೋವಿ ಅಂತ, ಓ.ಎಲ್.ನಾಗಭೂಷಣ ಸ್ವಾಮಿಯವರು ವಾರ್ ಯಾಂಡ್ ಪೀಸ್ ಅನ್ನು ಯುದ್ಧ ಮತ್ತು ಶಾಂತಿ ಅಂತ, ಥೆ ಗಾಡ್ ಫ಼ಾದರ್ ಅನ್ನು ಎಮ್.ವಿ.ನಾಗರಾಜ ರಾವ್ ಮತ್ತು ರವಿ ಬೆಳಗೆರೆ ಅದೇ ಹೆಸರಲ್ಲಿ ಕನ್ನಡಕ್ಕೆ ತಂದಿದ್ದಾರೆ ಅಂತ, ಗಾನ್ ವಿತ್ ದ ವಿಂಡ್, ಗುಡ್ ಅರ್ತ್ ,ಓಲ್ಡ್ ಮ್ಯಾನ್ ಯಾಂಡ್ ಸೀ,ಅನ್ನಾ ಕರೇನಿನಾ ದ ಟ್ರಯಲ್, ಮೆಟಾಮೊರ್ಫ಼ೋಸಿಸ್  ಹೀಗೆ ಜಗತ್ತಿನ ಅತ್ಯುತ್ತಮ ಕೃತಿಗಳೆಲ್ಲಾ ಈಗಾಗಲೇ ಕನ್ನಡಕ್ಕೆ ಬಂದಿವೆ. ಕೆಲವು ಮೂಲವನ್ನ ಮೀರಿಸಿವೆ.ಕೆಲವು ಹಳಿ ತಪ್ಪಿವೆ. ಆದರೆ ಸವಿಯ ಸವಿಯಲು ಇಷ್ಟು ಸಾಕಲ್ಲ!
ನಿನ್ನೆ ಹೀಗೇ ಜ್ಯೋತಿಯ ನವಕರ್ನಾಟಕ ಪುಸ್ತಕ ಮಳಿಗೆಯಲ್ಲಿ ತಡಕಾಡುತ್ತಿದ್ದಾಗ, ಹಠಾತ್ತಾಗಿ ಫ಼್ರೆಡ್ ರಿಕ್ ಫ಼ೋರಿಸ್ಯ್ತ್ ನ ಡೆ ಆಫ಼್ ಜಾಕಲ್ ನ ಕನ್ನಡ ಅನುವಾದ 'ಅವನದೇ ಆ ದಿನ' ಕಣ್ಣಿಗೆ ಬಿದ್ದು ಹೀಗೆಲ್ಲಾ ಅನಿಸಿತು!

ಅವಸ್ಥೆ

ನಮ್ಮ ಪಾಡಿಗೆ ನಾವು
ಅದೇ ವೃತ್ತದ ಪರಿಧಿಯಲ್ಲಿ;
ಬೆಳಗ್ಗೆ ಅಲರಾಮ್ ಸದ್ದು,
ದೋಸೆಯ ಚುಯ್;
ಮಕ್ಕಳ ಶಾಲೆಯ ವ್ಯಾನು,
ಹೊತ್ತೇರಿದಂತೆ
ಮಧ್ಯಾಹ್ನದ ಅಡಿಗೆಯ ಚಿಂತೆ,
ಊಟವಾದ ಮೇಲೆ ಕೋಳಿ ನಿದ್ದೆ;
ಸಂಜೆಯ ಚಾ,
ರಾತ್ರಿಯ ಸೀರಿಯಲ್ಲು,
ಎಣಿಸಿ ತಪ್ಪಿದ ಸೆಕ್ಸು,
ಆಮೇಲಿನ ಮಂಪರು
ಎಲ್ಲ ದಿನ ಹೀಗೇ ಅಲ್ಲ:
ಯಾವುದೋ ಹಾಡು
ಎದ್ದಾಗಿಂದ ಕಾಡಿ,
ನೆನಪು ಸುರುಳಿಯಾಗಿ ಅಂಗಾತ ಬಿದ್ದು,
ಪಲ್ಲವಿಯೇ ಸಾಲಾಗಿ
ದಾರಿ ತಪ್ಪಿದ ದೈನೇಸಿ;
ಇದೆಲ್ಲದರ ಅರ್ಥವೇನು?
ಕೊಂಚ ಚಿಂತೆ
ಉತ್ತರ ಹೊಳೆಯುವ ಮೊದಲೇ
ಮತ್ತೆ ಓಟ,
ತಂಪಾದ ಕ್ಷಣಗಳ ಆಯುಸ್ಸು
ತುಂಬಾ ಕಮ್ಮಿ!

ಎರಡು ಹುಚ್ಚಿನ ಕುರಿತು...

ಇವತ್ತು ಎರಡು ಹುಚ್ಚಿನ ಬಗೆಗೆ ಹೇಳಲೇ ಬೇಕು! ಸಿನಿಮಾ ನೋಡೋದು ಮತ್ತು ಪುಸ್ತಕ ಓದೋದು.
ಸಿನಿಮಾ ನೋಡೋದು ಮಂಗಳೂರಿನಲ್ಲಿ ಕಲಿಕೆಗೆ ಬಂದ ಮೇಲೆ ಶುರುವಾದದ್ದಾದರೆ ,ಪುಸ್ತಕ ಓದೋದು ತುಂಬಾ ಹಿಂದೆ ನನ್ನೂರಲ್ಲಿ ಒಳ್ಳೆ ಶಾಲೆ ಇಲ್ಲಾ ಅಂತ ನನ್ನನ್ನೂ ತಂಗಿಯನ್ನೂ ಬಿ.ಸಿ.ರೋಡಲ್ಲಿ ದೊಡ್ಡಪ್ಪನ ಮನೆಯಲ್ಲಿ ಸೇರಿಸಿದಾಗಿಂದ ಅಂಟಿಕೊಂಡದ್ದು!
ನನಗೀಗಲೂ ನೆನಪಿದೆ; ಪ್ರತೀ ಶನಿವಾರ ನನ್ನನ್ನೂ ತಂಗಿಯನ್ನೂ ಅಪ್ಪ ಊರಿಗೆ ಕರಕೊಂಡು ಹೋಗಿ ಸೋಮವಾರ ಬೆಳಿಗ್ಗೆ ವಾಪಸ್ ತಂದು ಬಿಡುತ್ತಿದ್ದರು. ಒಂದು ಸಲ ಅಪ್ಪನ ಬದಲು ನನ್ನಣ್ಣ ಪ್ರದೀಪ ,ದೇರಳಕಟ್ಟೆಯಲ್ಲಿ ಡೆಂಟಲ್ ಕಾಲೇಜ್ ನಲ್ಲಿ ಓದುತ್ತಿದ್ದವ ಕರಕೊಂಡು ಹೋಗಲು ಬಂದಿದ್ದವ, ನನ್ನ ಮಾತಿನ ರಭಸ ತಾಳಲಾರದೆ 'ಬಾಲ ಮಂಗಳ' ವೊಂದನ್ನು ತೆಗೆದುಕೊಟ್ಟು "ಇನ್ನು ಮನೆ ಸೇರುವವರೆಗೂ ಮಾತಾಡಬಾರದು" ಎಂದು ತಾಕೀತು ಮಾಡಿದ್ದ! ಅವತ್ತು ಸಿಕ್ಕಿದ ಅಕ್ಷಯ ನಿಧಿ ಆಮೇಲಾಮೇಲೆ ದೊಡ್ಡಪ್ಪನ ಮನೆಯಲ್ಲಿ ಬರುತ್ತಿದ್ದ ತರಂಗ, ಅಕ್ಕ ಓದುತ್ತಿದ್ದ  'ಚಿಂತನ' ಲೈಬ್ರರಿಯ ಕಾದಂಬರಿಗಳು( ಅವನ್ನು ನಾನು ಕದ್ದು ಓದುತ್ತಿದ್ದೆ) ಹೀಗೆ ಬೆಳೆಯಿತು.ವಾರಕ್ಕೊಮ್ಮೆ ಮನೆಗೆ ಹೋಗುವಾಗ ಅಪ್ಪನ ಪೀಡಿಸಿ ಬಾಲಮಂಗಳ,ಚಂದಮಾಮ,ಬಾಲಮಿತ್ರ,ಚಂಪಕ ಹೀಗೆ ಕೈಗೆ ಸಿಕ್ಕಿದ್ದೆಲ್ಲ ಓದುವುದೇ...ಅಜ್ಜನ ಅಟ್ಟದ ಮೇಲೆ ಜೋಪಾನವಗಿಟ್ಟ ೬೪ ವಿದ್ಯೆಗಳ ಪುಸ್ತಕದಲ್ಲಿ ಸಮ್ಮೋಹನ ವಿದ್ಯೆ ಓದಿ ಏಕ ಬಿಂದುವಲ್ಲಿ ದಿಟ್ಟಿ ನೆಟ್ಟೂ ಕೂತದ್ದು, ಶಕ್ತಿಮದ್ದು ಅಂತ ಸಿಕ್ಕಿದ ಸೊಪ್ಪು ಅರೆದು ಬಾವ ನವನೀತ ಮತ್ತು ತಂಗಿಯ ಜೊತೆ ಸೇರಿ ನವನೀತನ ತಂಗಿ ನಮಿತಳಿಗೆ ಕುಡಿಸಲು ಹೊರಟು ಅತ್ತೆಯ ಕೈಯಲ್ಲಿ ಬೈಗಳು ತಿಂದು ಆಮೇಲೆ 'ಟೆಸ್ಟ್' ಮಾಡಲು ಅದನ್ನ ಮನೆ ನಾಯಿಗೆ ಕುಡಿಸಿದ್ದು, ಹೀಗೆ ಓದು ಎಂಬುದು ಪಠ್ಯಪುಸ್ತಕಗಳ ಹೊರತಾಗಿ ಗಾಳ ಹಾಕಿದಂತೆಲ್ಲಾ ಮೀನು ಸಿಗುವ ಅದೃಷ್ಟದಂತೆ ನನಗೆ ದೊರೆತಿದೆ.. ಈ ಹುಚ್ಚಿಗೆ ಅಕ್ಕ ಸ್ವಾತಿಯ ಓದಿನ ಹುಚ್ಚೂ ಜತೆಗೂಡಿ ಅದು ಓದು ಇದು ಓದು ಎಂಬ ಅವಳ ಸಲಹೆಗಳು ಮಾಡಿದ ಉಪಕಾರ ಅಷ್ಟಿಷ್ಟಲ್ಲ! ರೊಟ್ಟಿ ಜಾರಿ ತುಪ್ಪದಲ್ಲಿ ಬಿದ್ದಂತೆ  ನಾನು ಪಿಯುಸಿಗೆ ಸೇರಿದ್ದು ದೊಡ್ಡ ಗ್ರಂಥಾಲಯವಿರುವ ಪುತ್ತೂರಿನ ವಿವೇಕಾನಂದ ಕಾಲೇಜಿಗೆ! ಅದರಲ್ಲೂ ಅಲ್ಲಿ ಆಗ ತಾನೆ ರೀ ಓಪನ್ ಆದ ಹಾಸ್ಟೆಲ್ ಗೆ; ಎಲ್ಲರೂ ಮುಗಿಬಿದ್ದು ಓದಿ ಒಳ್ಳೆಯ ಭವಿಷ್ಯಕ್ಕೋಸ್ಕರ ಅಂತ ಲೆಕ್ಚರರ್ ಗಳು ಊದಿದ ಶಂಖ ನನ್ನ ಮಂಡೆಗೇ ಹೋಗಲಿಲ್ಲ, ಸದಾ ಅಪ್ಪನ ಭಾಷೆಯಲ್ಲಿ 'ಕಥೆ ಪುಸ್ತಕ' ಅಂತ ನಿಕೃಷ್ಟವಾಗಿ ಕರೆಯಲ್ಪಡುವ ಪುಸ್ತಕಗಳ ಕಪಾಟಿನ ಮಧ್ಯೆಯೇ ಇರುತ್ತಿದ್ದೆ. ಎಷ್ಟೆಲ್ಲಾ ಓದಿದೆ ಅಂತ ನೆನೆಸಿಕೊಂಡರೆ ಖುಷಿಯಾಗುತ್ತದೆ; ಭವಿಷ್ಯ ಹಾಳಾಯಿತ ಅಂತ ಕೇಳಿದರೆ ಇನ್ನೂ ಉತ್ತರ ಸಿಕ್ಕಿಲ್ಲ!
ಮಂಗಳೂರಲ್ಲಿ ಬಂದ ಮೇಲೆ ನಾನೇ ರಾಜ,ನಾಲ್ಕು ನಾಲ್ಕು ಲೈಬ್ರರಿಗಳ ಸದಸ್ಯನಾಗಿ 'ಒಂಥರಾ ಹುಚ್ಚು ಹಿಡಿವಷ್ಟು '(ಖಂಡಿತಾ ಪಠ್ಯ ಅಲ್ಲ).. ಈಗ ಬಿಡಿ ಕೆಲಸಕ್ಕೆ ಹೋಗಲು ಶುರುವಾದ ಮೇಲೆ, ತಿಂಗಳು ತಿಂಗಳು ಏನಾದರು ಪುಸ್ತಕ ತರದಿದ್ದರೆ ಕಳಕೊಂಡ ಅನುಭವ, ಗಿಫ಼್ಟ್ ಏನು ಬೇಕು ಅಂತ ಯಾರಾದರು ಕೇಳಿದರೆ ಪುಸ್ತಕ ಅನ್ನುವುದೇ ಸಿದ್ದ ಉತ್ತರ, ಆದರೂ ಈಗೀಗ ಕೈಗೆ ಸಿಕ್ಕಿದ್ದೆಲ್ಲಾ ಓದಲಾಗುತ್ತಿಲ್ಲ, ಕೆಲವೆಲ್ಲಾ 'ಇಶ್ಶೀ' ಅನಿಸಿದರೆ ಕೆಲವೆಲ್ಲಾ ಬೋರು..ವಯಸ್ಸಾದಂತೆ ಹೀಗೂ ಆಗುತ್ತೇನೋ!
ಇನ್ನು ಸಿನಿಮಾ ಬಗ್ಗೆ, ಕಲಿಯಲೆಂದು ಬಂದವ ಹತ್ತಿ ಇಳಿಯದ ಥಿಯೇಟರಿಲ್ಲ, ೭ ಗಂಟೆಯ ಸಿನಿಮಾಕ್ಕೆ ಹೋಗುವುದ ವಾಪಸ್ ಕೆಲವೊಮ್ಮೆ ಬಸ್ ಇರದಾಗ ನಡಕೊಂಡು ಬರೋದು ಒಂಥರಾ ಖುಷಿ ಆದರೆ ನಾಳೆ ಹೇಗೋ ಈಗ ಹೀಗೆ ಮಾಡಿದರೆ ಅಂತ ಭಯವಾಗುತ್ತಿದುದೂ ಸುಳ್ಳಲ್ಲ; ಒಮ್ಮೆ ಹೀಗಾಯ್ತು,ಯಾವನೂ ಬರಲಿಲ್ಲ ಅಂತ ಒಬ್ಬನೇ ಸಿನಿಮಾಕ್ಕೆ ಹೋಗಿದ್ದೆ.ಬೆಳಕೆಲ್ಲ ಆರಿ ಸಿನಿಮಾ ಶುರುವಾದ ಕೂಡಲೆ ಅನಾಥ ಪ್ರಜ್ನೆ ಕಾಡತೊಡಗಿತು,ಇಡೀ ಜಗತ್ತಲ್ಲಿ ನಾನೊಬ್ಬನೇ ದುಃಖಿ, ಮತ್ತೆಲ್ಲಾ ಎಷ್ಟು ಸುಖವಾಗಿದ್ದಾರೆ ಎಂಬ ತಬ್ಬಲಿತನ! ಗೊಳೋ ಎಂದು ಅಳಬೇಕು ಅನಿಸುವಷ್ಟು ಬೇಜಾರಾಗಿತ್ತು ಅದನ್ನೇ ಗೆಳೆಯನ ಬಳಿ ಹೇಳಿಕೊಂಡಾಗ " ಒಬ್ಬನೇ ಸಿನಿಮಾಗೆ ಮತ್ತು ಒಬ್ಬನೇ ಕುಡಿಯಲು ಬಾರ್ ಗೆ ಹೋಗಲೇಬಾರದು" ಅಂತ ಉಪದೇಶ ಕೊಟ್ಟ ಪುಣ್ಯಾತ್ಮ! ಹಾಗೆ ಓದು ಮುಗಿದು ಕೆಲಸಕ್ಕೆ ಸೇರಿದ ಮೇಲಂತೂ ರಾಶಿ ರಾಶಿ ಸಿನಿಮಾ ನೋಡಿದೆ.ಡೌನ್ ಲೋಡ್ ಮಾಡುದು ನೋಡೂದು , ಅದರಲ್ಲೂ 'ದ ಗಾಡ್ ಫ಼ಾದರ್' ಸಿನಿಮಾ ಹುಚ್ಚು ಎಷ್ಟರ ಮಟ್ಟಿಗೆ ಅಂದರೆ ಸಿನಿಮಾ ನೋಡಿ ಅದರ ಅನುವಾದಿತ ಪುಸ್ತಕ ಓದಿ ,ಮೂಲವೂ ಓದಿ ಇನ್ನೂ ತಣಿಯದೆ ಆ ಕಂಪ್ಯೂಟರ್ ಗೇಮನ್ನೂ ಖರೀದಿಸಿ ಮನದಣಿಯೆ ಆಡಿ ಮನೆಯವರ ಕೈಯಲ್ಲಿ,ರೂಮ್ ಮೇಟುಗಳ ಕೈಲಿ ಬೈಗುಳ ತಿಂದೌ, ಅಬ್ಬಬ್ಬಾ... ಈಗಲೂ ಮನೆಯಲ್ಲಿ ಯಾರಿಲ್ಲ ಅಂದರೆ ನಾಲ್ಕಾರು ಗ್ಯಾಂಗ್ ಸ್ಟರ್ ಗಳ ಕೊಲ್ಲುವ ಅಂತ ಆಡಲು ಸುರುವೇ!
ನಿನಗ್ಯಾವುದು ಇಷ್ಟ ಅಂತ ಯಾರದರು ಕೇಳಿದರೆ ನನ್ನ ಆಯ್ಕೆ ಪುಸ್ತಕವೇ.. ಅಲ್ಲಿ ನನಗೆ ಬೇಕಾದ ಏಕಾಣ್ತವಿದೆ,ಯಾರನ್ನೂ ತೃಪ್ತಿಪಡಿಸಬೇಕಾದ ಅನಿವಾರ್ಯತೆ ಇಲ್ಲ, ಜೊತೆಗೆ ಕರಕೊಂಡು ಹೋದವನ ಅಭಿಪ್ರಯದ ಮೇಲೆ ನಮ್ಮ ಅಭಿಪ್ರಾಯವೂ ಬದಲಾಗುವ ಭಯವಿಲ್ಲ!  ಎಲ್ಲದಕ್ಕಿಂತ ಮುಖ್ಯ ಕಲ್ಪನೆಗೆ ಜಾಗವಿದೆ!
ಸದ್ಯಕ್ಕಂತೂ ಎರಡು ಹುಚ್ಚುಗಳಿಂದ ಬಿಡುಗಡೆಯಿಲ್ಲ; ಮುಂದೆ ಸಿಗಬಹುದೆಂಬ ನಿರೀಕ್ಷೆಯೂ ಇಲ್ಲ!

ಅವರ ಪ್ರಶ್ನೆ ಮತ್ತು ನನ್ನ ಉತ್ತರ

(ಇಲ್ಲಿ ೨೫ ಪ್ರಶ್ನೆಗಳಿವೆ. ಐದಕ್ಕಾದರೂ ನಿಮ್ಮ ಬಳಿ ಉತ್ತರಗಳಿವೆ. ಮಾತಾಡಿ)

ಎಲ್ಲರಿಗೂ ಪುಸ್ತಕಗಳನ್ನು ಓದುವುದೆಂದರೆ ಇಷ್ಟ. ಕೆಲವರಂತೂ ಟೀವಿ, ಇಂಟರ್‌ನೆಟ್, ಮೊಬೈಲ್ ಸವಲತ್ತುಗಳಾಚೆಗೂ ಕನ್ನಡಿಗರಲ್ಲಿ ಓದುವ ಹವ್ಯಾಸ ಬೆಳೆಯುತ್ತಿದೆ, ಪುಸ್ತಕಗಳ ಮಾರಾಟ ಹೆಚ್ಚುತ್ತಿದೆ ಎನ್ನುತ್ತಾರೆ.

ಹಾಗೆಯೇ ಫೇಸ್ ಬುಕ್‌ನಂಥ ತಾಣಗಳಲ್ಲಿ ಸದಾ ಏನನ್ನಾದರೂ ಪೋಸ್ಟ್ ಮಾಡುತ್ತಿರುತ್ತೇವಾದರೂ  ಪುಸ್ತಕಗಳ ಬಗ್ಗೆ ಅಲ್ಲಿ ಮಾತುಕತೆ ನಡೆಯುವುದು ಕಡಿಮೆ. ಹೋಗಲಿ ಎಂದರೆ ಚುಕ್ಕುಬುಕ್ಕುನಂಥ ತಾಣದಲ್ಲೂ ಉತ್ಸಾಹದ ಪ್ರತಿಕ್ರಿಯೆಗಳ ಭರಾಟೆಯಾಗಲೀ, ವಾದ-ವಿವಾದಗಳಾಗಲೀ ನಡೆಯುವುದು ಕಾಣಿಸುವುದಿಲ್ಲ.

ತಾವಾಗಿ ಬರೆಯುವುದು ಹೋಗಲಿ, ಬೇರೆಯವರು ಅಲ್ಲಿ ಇಲ್ಲಿ ಬರೆದಾಗ ಪ್ರತಿಕ್ರಿಯಿಸುವುದಕ್ಕೂ ಸಾಧ್ಯವಾಗದಂತೆ ಮಾಡುವ ಅಂಶ ಯಾವುದು? ಪುಸ್ತಕಗಳ ಬಗ್ಗೆ ನಮ್ಮಲ್ಲಿ ಒಂದು ಆಶ್ಚರ್ಯಕರವಾದ  ಮೌನ ಇದೆ ಎಂದು ಅನಿಸುವುದಿಲ್ಲವೆ?

ತುಂಬ ಚೆನ್ನಾಗಿದೆ, ಸಕ್ಕತ್ತಾಗಿದೆ, ಸೂಪರ್, ವಾಹ್, ಎಂಥಾ ಒಳ್ಳೆಯ ಪುಸ್ತಕ, ಬಿಡುಗಡೆ ಯಾವಾಗ - ಕಾಯುತ್ತಿದ್ದೇವೆ ಮುಂತಾದ ಚುಟುಕು ಕಾಮೆಂಟುಗಳನ್ನು ಹೊರತು ಪಡಿಸಿದರೆ ಪುಸ್ತಕಗಳ ಬಗ್ಗೆ ಬರೆದಿದ್ದರ ಕುರಿತು ಚರ್ಚಿಸುವ  ಕಾಮೆಂಟುಗಳಿರುವುದೇ ಅಪರೂಪ.

ಇಲ್ಲಿ ಕೆಲವು ಪ್ರಶ್ನೆಗಳಿವೆ. ಇವುಗಳಲ್ಲಿ ಒಂದಾದರೂ ನೀವು ಉತ್ತರಿಸಲು ಯೋಗ್ಯವಾದ ಪ್ರಶ್ನೆಯಾಗಿರುವುದು ಸಾಧ್ಯವಿದೆ. ಪುಸ್ತಕಗಳಿಗಾಗಿಯೇ, ಓದುಗರಿಗಾಗಿಯೇ ಇರುವ ಈ ತಾಣ ನಿಮ್ಮ ಉತ್ತರಗಳಿಗೆ ಯೋಗ್ಯ ಸ್ಥಳ ಎನಿಸುತ್ತದೆ. ಉತ್ತರ ನಿರೀಕ್ಷಿಸಬಹುದೇ?

1. ಓದುವುದು ಒಂದು ಚಟ, ಅಬ್ಸೆಶನ್ ಆಗುವುದು ಯಾವಾಗ?

2. ನನಗೆ ಪುಸ್ತಕಗಳನ್ನ ಓದುವ ಅಭ್ಯಾಸವಿಲ್ಲ, ಹಿಂದೆಲ್ಲ ತುಂಬ ಓದುತ್ತಿದ್ದೆ, ಈಚೀಚೆಗೆ ಏನೂ ಇಲ್ಲ ಎನ್ನುವುದರ ಅರ್ಥವೇನು? ವರ್ಷಕ್ಕೆ ಒಂದೂ ಪುಸ್ತಕ ಓದಲಾಗುತ್ತಿಲ್ಲವೆ ಅಥವಾ ನಿಮ್ಮ ಲೆಕ್ಕಾಚಾರ ಏನು?

3. ಎಂಥಾ ಒಳ್ಳೆಯ ಪುಸ್ತಕವಿದು! ಓದಿದ್ದು ಸಾರ್ಥಕವಾಯ್ತು ಎನಿಸುವುದು ಯಾವಾಗ?

4. ಥತ್! ಎಂಥಾ ದರಿದ್ರ ಪುಸ್ತಕ! ದುಡ್ಡೂ ದಂಡ, ಟೈಮೂ ವೇಸ್ಟ್ ಎನಿಸುವುದು ಯಾವಾಗ?

5. ಪುಸ್ತಕವೇನೋ ಓದಲೇ ಬೇಕಾದ್ದು, ಆದರೆ ಕೈಲಿ ಹಿಡಿದಿದ್ದೇ ಹಾಳು ನಿದ್ದೆ ಬಂದು ಬಿಡುತ್ತದೆ ಯಾಕೆ?

6. ಅಯ್ಯೋ ತುಂಬಾ ಬೋರು ಈ ಪುಸ್ತಕ ಎನ್ನುವಂತಾಗುವುದು ಯಾವಾಗ?

7. ನಿಮ್ಮನ್ನೇ ನೀವು ಮರೆತು ನಿಮ್ಮನ್ನು ಆವರಿಸಿಕೊಂಡು ಬಿಡುವ ಪುಸ್ತಕ ಹೇಗಿರುತ್ತದೆ?

8. ಯಾವುದು ಒಳ್ಳೆಯ ಪುಸ್ತಕ, ಯಾವುದು ಸಾಧಾರಣ, ಯಾವುದು ಓದಲೇ ಬೇಕಾದ್ದು?

9. ಓದುವ ಅಭ್ಯಾಸ ಮತ್ತು ಸುಮ್ಮನೇ ಪುಸ್ತಕ ಕೊಂಡುಕೊಳ್ಳುತ್ತಾ ಹೋಗುವುದು - ಇವೆರಡರ ನಡುವಿನ ಅನುಪಾತ ಹೇಗಿರಬೇಕು?

10. ಕೊಂಡುಕೊಂಡ ಪುಸ್ತಕಗಳೇ ರಾಶಿ ಬಿದ್ದಿವೆ, ಯಾವಾಗ ಓದುವುದೋ ಏನೋ ಎನಿಸುತ್ತದೆಯೆ?

11. ಸಿಕ್ಕಾಪಟ್ಟೆ ಓದುತ್ತೇನೆ, ಆದರೆ ಕೊಂಡುಕೊಳ್ಳುವ ಅಗತ್ಯ ಬಿದ್ದಿಲ್ಲ. ಲೈಬ್ರರಿಗಳಿವೆಯಲ್ಲ ಎನ್ನುವವರಿದ್ದಾರೆಯೇ?

12. ನಿಮಗಿಷ್ಟವಾದ ಲೈಬ್ರರಿಯ ಬಗ್ಗೆ ಏನಾದರೂ ಹೇಳುವುದಿದೆಯೆ?

13. ವಾರಪತ್ರಿಕೆಗಳು, ಮಾಸಪತ್ರಿಕೆಗಳು, ಸಾಪ್ತಾಹಿಕ ಪುರವಣಿಗಳು, ಆನ್‌ಲೈನಿನಲ್ಲಿ ಅವರಿವರು ಓದು ಎಂದಿದ್ದು, ನಾವೇ ಆರಿಸಿಕೊಂಡಿದ್ದು - ಇವುಗಳ ನಡುವೆ ಪುಸ್ತಕಗಳಿಗೆಲ್ಲಿ ಅವಕಾಶ ಎನ್ನುತ್ತೀರಾ? ಹಾಗಿದ್ದರೆ ಅಂಥ ಓದು ಎಷ್ಟು ಸಮಯ ತೆಗೆದುಕೊಳ್ಳುತ್ತಿದೆ, ಎಷ್ಟು ಓದುತ್ತೀರಿ?

14. ನಿಮ್ಮ ಓದನ್ನು ನಿಮ್ಮ ಆಸಕ್ತಿಗನುಗುಣವಾಗಿ ವಿಭಾಗಿಸಲು ಸಾಧ್ಯವಿದೆಯೆ? ಕನ್ನಡದ ಕೃತಿಗಳು, ಕನ್ನಡಕ್ಕೆ ಅನುವಾದಿತ ಕೃತಿಗಳು, ಸಾಹಿತ್ಯ, ಕಾದಂಬರಿ, ಕಥಾಸಂಕಲನಗಳು ಅಥವಾ, ವೈಜ್ಞಾನಿಕ, ಸಾಮಾಜಿಕ, ಚಾರಿತ್ರಿಕ, ಪೌರಾಣಿಕ, ಆತ್ಮಚರಿತ್ರೆಗಳು - ಹೀಗೆ? ಅಂದರೆ ನಿಮ್ಮ ಓದು ಫೋಕಸ್ಡ್ (ಸಿಲೆಕ್ಟಿವ್) ಎನ್ನುತ್ತೀರಾ?

15. ನೀವು ಪುಸ್ತಕವೊಂದನ್ನು ಓದಲು/ಕೊಂಡುಕೊಳ್ಳಲು ಆರಿಸುವ ಕ್ರಮ ಯಾವುದು?

16. ನಿಮ್ಮ ಬಳಿಯಿರುವ ಅಥವಾ ನೀವು ಬಯಸಿದರೂ ಇನ್ನೂ ಓದದ ಎಲ್ಲಾ ಪುಸ್ತಕಗಳ ಒಂದು ಪಟ್ಟಿಯನ್ನು ತಯಾರಿಸಿ, ಅವುಗಳನ್ನು ಓದುವ ಒಂದು ಅನುಕ್ರಮಣಿಕೆಯನ್ನು ನೀವೇ ಸಿದ್ಧಪಡಿಸಿಕೊಂಡು, ಅದನ್ನು ಚಾಚೂತಪ್ಪದೆ ಓದಿ ಮುಗಿಸುವ ಒಂದು ಶಿಸ್ತನ್ನು ವಿಧಿಸಿಕೊಳ್ಳುವ ಬಗ್ಗೆ ನಿಮ್ಮ ಅಭಿಪ್ರಾಯವೇನು? ಹಾಗೆ ಮಾಡುವಾಗ ನೀವು ಕೃತಿಕಾರ,ವಿಷಯ, ಪುಸ್ತಕದ ದಪ್ಪ - ಹೀಗೆ ಯಾವ ಮಾನದಂಡವನ್ನು ಬಳಸಲು ಬಯಸುತ್ತೀರಿ?

17. ನಿಮ್ಮ ಬುಕ್ ಶೆಲ್ಫ್‌ನಲ್ಲಿ ನೀವು ಪುಸ್ತಕಗಳನ್ನು ಜೋಡಿಸುವ, ಮರುಜೋಡಿಸುವ, ಒಪ್ಪಮಾಡಿಡುವ ಕ್ರಮದ ಬಗ್ಗೆ ಏನನಿಸುತ್ತದೆ?

18. ನಿಮ್ಮ ಬಳಿಯಿರುವ ಎಲ್ಲಾ ಪುಸ್ತಕಗಳನ್ನು ಓದಿ ಮುಗಿಸಲು ಸಾಧ್ಯ ಎನಿಸುತ್ತಾ? ನೀವು ಓದುವುದಿಲ್ಲ ಎನಿಸುವ ಪುಸ್ತಕಗಳೂ ನಿಮ್ಮಲ್ಲಿವೆಯೆ? ಯಾವತ್ತೂ ಓದಲಿಕ್ಕಾಗಲಿಕ್ಕಿಲ್ಲ ಎನಿಸುವ ಪುಸ್ತಕಗಳಿವೆಯೆ? ಇಟ್ಟುಕೊಳ್ಳಲು ಬಯಸದ ಪುಸ್ತಕಗಳಿವೆಯೆ?

19. ಮೊತ್ತಮೊದಲಿಗೆ ಇದನ್ನೇ ಓದಬೇಕು ಎಂದುಕೊಂಡ ಎಷ್ಟು ಪುಸ್ತಕಗಳಿವೆ ನಿಮ್ಮ ಬಳಿ?

20. ಬದುಕಿನಲ್ಲಿ ಓದುವುದಕ್ಕೇ ಪ್ರಾಶಸ್ತ್ಯ ಕೊಡುವುದಾದರೆ, ಯಾವೆಲ್ಲ ಸಂಗತಿಗಳನ್ನು ನೀವು ಕಳೆದುಕೊಳ್ಳಬೇಕಾಗುತ್ತದೆ?

21. ಓದುವುದು ಒಂದು ಬಗೆಯ ಪಲಾಯನವಾದ ಎನ್ನುವುದನ್ನು ಒಪ್ಪುತ್ತೀರಾ?

22. ತಿಂಗಳಿಗೆ ಎಷ್ಟು ಪುಸ್ತಕ (ಪುಟಗಳು) ಓದುವುದು ಸಾಧ್ಯ ನಿಮಗೆ?

23. ಅಷ್ಟಕ್ಕೂ ನೀವು ಓದುವುದರ ಹಿಂದಿನ ಉದ್ದೇಶವಾದರೂ ಏನು?

24. ಒಂದು ಪುಸ್ತಕ ಓದಿ ಮುಗಿಸಿದ ನಂತರ ಏನು ಮಾಡುತ್ತೀರಿ? ಅದರ ಬಗ್ಗೆ ಯೋಚಿಸುತ್ತೀರಾ, ನೋಟ್ಸ್ ಮಾಡಿಕೊಳ್ಳುತ್ತೀರಾ, ಬರೆಯುತ್ತೀರಾ ಅಥವಾ ನಿಮ್ಮ ಯಾವುದೇ ಅಧ್ಯಯನ ಇತ್ಯಾದಿಗಳಿಗೆ ಅದು ಸಹಕಾರಿಯಾಗುತ್ತದೆಯೆ?

25. ಪುಸ್ತಕವನ್ನೇ ಓದದಿದ್ದರೆ ಏನಾಗುತ್ತದೆ?

my an೧.ಓದು ಖುಷಿ ಕೊಡುವಾಗ

೨. ಕಳೆದು ಹೋಗುವ ಭಯ. ಅಥವಾ ಬದಲಾದ ಜೀವನ ಶೈಲಿ
೩. ಕೊನೆಯ ಪುಟ ತಿರುಗಿಸಿದಾಗ 'ಛೇ, ಮುಗಿದೇ ಹೋಯ್ತಲ್ಲಾ ಅನ್ನಿಸಿದಾಗ'
೪. ೪೦ ಪುಟಗಳಾದರೂ ಕಷ್ಟಪಟ್ಟು ಮುಂದುವರೆಸಬೇಕಾಗಿ ಬಂದಾಗ...
೫. ಯಾರೋ ಹೇಳಿ ಅಥವಾ ಒಳ್ಳೆ ಸಾಹಿತ್ಯ ಅಂತ ರಿವ್ಯೂ ಬಂದಿದೆ ಅಂತ ದುಡ್ಡು ಕೊಟ್ಟು ತಂದರೂ ಅದರಲ್ಲಿದ್ದದ್ದು ಮೆದುಳಿಗೆ ಹತ್ತದಾಗ
೬. ಇಷ್ಟಪಟ್ಟಲ್ಲದೆ , ಕಷ್ಟಪಟ್ಟು ಓದಬೇಕಾಗಿ ಬಂದಾಗ
೭.ಕಣ್ಣಿಗೆ ಕಟ್ಟಿದ ಪಾತ್ರ ಚಿತ್ರಣ ಮತ್ತು ಸಹಜವೆನಿಸುವ ಸುಲಲಿತ ಶೈಲಿ ಇದ್ದಾಗ
೮.ಎರಡನೇ ಸಲ ಓದಲು ತೆಗೆದಾಗ ಖುಷಿಕೊಡುವುದು ಒಳ್ಳೆಯ ಪುಸ್ತಕ, ಲೈಬ್ರರಿಯಿಂದ ಕಡ ತಂದರೆ ಆಗುತ್ತಿತ್ತು ಎನ್ನುವುದು ಮಧ್ಯಮ, ಯಾಕಪ್ಪಾ ಇಲ್ಲಿ ಸಿಕ್ಕಿಬಿದ್ದೆ ಅನಿಸುವುದು ಅಧಮ!
೯.ಖಂಡಿತಾ ೧:೧..ಇಲ್ಲವಾದರೆ ಉಪಯೋಗವೇನು?
೧೦.ಕೆಲವೊಮ್ಮೆ.ಅದರಲ್ಲೂ ಇಂಗ್ಲೀಷ್ ಪುಸ್ತಕ ನೋಡುವಾಗ
೧೧.ಇಷ್ಟವಾದದ್ದು ಸಂಗ್ರಹಯೋಗ್ಯ ಅಂತ ಹಟ ಹಿಡಿಯುವ ಮನಸಿದ್ದರೆ ಮನೇಲೇ ಲೈಬ್ರರಿ
೧೨.ತುಂಬಾ ಇದೆ..ನಾನು ಹೋದ ಪುತ್ತೂರು ವಿವೇಕಾನಂದ ಕಾಲೇಜಿನ ಲೈಬ್ರರಿ, ವಿಟ್ಲ, ಮಂಗಳೂರು,ಹಾಸನ,ಸುರತ್ಕಲ್ ನ ಸರಕಾರಿ ಲೈಬ್ರರಿಗಳಲ್ಲಿ ನಾನು ಯಾವುದು ಅಮೂಲ್ಯ ಅಂತ ತಿಳಿದ ಪುಸ್ತಕಗಳು ಓದುವವರಿಲ್ಲದೆ ಧೂಳು ಹಿಡಿದು ಕೊನೆಗೊಂದು ದಿನ ಗೋಣಿ ಚೀಲದೊಳಗೆ ರದ್ದಿ ಅಂಗಡಿಗೆ ಹೋಗುವುದು ನೋಡುವಾಗ ಬೇಸರವಾಗುತ್ತದೆ.
೧೩.ಮ್ಯಾಗಜಿನ್ಸ್ ಓದಲು ೧-೨ ಗಂಟೆ ಸಾಕು..ಆದರೆ ಪುಸ್ತಕ ಓದುವ ಮಜವೇ ಬೇರೆ!
೧೪.ಇಲ್ಲ.ಮೊದಲು ಬರೇ ಕಾದಂಬರಿ ಓದುತ್ತಿದ್ದ ನನಗೆ ಈಗ ಆತ್ಮಕಥೆ,ವಿಮರ್ಶಾ ಬರಹಗಳ ರುಚಿ ಹತ್ತಿದೆ..ಕವಿತೆ ಕಬ್ಬಿಣದ ಕಡಲೆ.
೧೫. ಲೇಖಕರು,ವಸ್ತು
೧೬.ಈಗೀಗ ಒಂದು ಸಲಕ್ಕೆ ಒಬ್ಬ ಲೇಖಕನ ಎಲ್ಲಾ ಪುಸ್ತಕ ಮುಗಿಸುವ ಪರಿಪಾಠ...ಕನ್ನಡದಲ್ಲಿ ಮಹತ್ವದ ಲೇಖಕರನ್ನ ಚಿಕ್ಕದಿಂದ ಓದಿದ ಕಾರಣ ಈಗ ಪಟ್ಟು ಹಿಡಿದು ಇಂಗ್ಲೀಷ್ ಓದುವುದು..ಆದರೂ ಹೊಸ ಪುಸ್ತಕ ಬಂದರೆ ಮೊದಲ ಆದ್ಯತೆ ಅದಕ್ಕೇ!
೧೭.ಒಂದೊಂದು ಪ್ರಕಾರಕ್ಕೆ ಅದರ ಸ್ಥಾನ.ಆದರೆ ಹುಡುಕಾಡುವ ಖುಷಿಯೇ ಬೇರೆ!
೧೮.ನನ್ನ ಬಳಿಯ ಎಲ್ಲಾ ಕನ್ನಡ ಪುಸ್ತಕ ಮುಗಿಸಿದ್ದೇನೆ.ಓದಲಸಾಧ್ಯ ಅನ್ನುವ ಪುಸ್ತಕಗಳು ಇಂಗ್ಲೀಷ್ ನ ಕೆಲವಿವೆ..ಈಗ ಅದೇ ಡೆಡ್ ಲೈನ್ ಮುಗಿಸುವ ಆತುರ.
೧೯.ಹೊಸ ಪುಸ್ತಕ ಕೊಂಡ ಕೂಡಲೆ ಓದ ಹೊರಡುವುದರಿಂದ ಅಂತಹ ಪ್ರಶ್ನೆ ಬರುವುದಿಲ್ಲ.
೨೦.ಎಲ್ಲದಕ್ಕೂ ಅದರ ಸಮಯ ಕೊಟ್ಟರೆ ಮಾತ್ರ ನಿರಾತಂಕದ ಓದು ಸಾಧ್ಯ!
೨೧.ಅಲ್ಲ.ಅದು ಖುಷಿ.
೨೨.ಕನ್ನಡವಾದರೆ ೧೫-೧೬ ಇಂಗ್ಲೀಷ್ ಆದರೆ ೪-೫
೨೩.ಖುಷಿ ಕೊಡುತ್ತದೆ... ನನ್ನದೇ ಲೋಕದಲ್ಲಿ ವಿಹರಿಸುವ ಆಹ್ಲಾದ.
೨೪.ಸಾಧ್ಯವಾದರೆ ಬ್ಲಾಗ್ ನಲ್ಲಿ ಬರೆಯುತ್ತೇನೆ.ಇಲ್ಲ ಅದೇ ಪುಸ್ತಕದ ಬಗ್ಗೆ ವಸ್ತುವಿನ ಬಗ್ಗೆ ಹುಡುಕುತ್ತೇನೆ.ಮುಂದಿನ ಪುಸ್ತಕದ ಕಡೆ ಹೋಗುತ್ತೇನೆ.

೨೫. ಅಂತಹ ಬದುಕು ನನಗಂತೂ ಬೇಡ!

into the wild ಮತ್ತು ನಿಜದ ಪೊಳ್ಳು

ಬೆಸ್ಟ್ ಸೆಲ್ಲರ್ ಥ್ರಿಲ್ಲರ್ಗಳ ನಂತರವೇನಾದರು ಸಾವಧಾನದ ಕತೆಗೆ ಮರಳಿದರೆ ಮನಸು ಪುಟ ಹಾರಿಸುತ್ತದೆ. ಅಬ್ದುಲ್ ರಶೀದರ ಬರಹವೊಂದನ್ನ ಪಟ್ಟಾಗಿ ಓದಕೂತಾಗಲೇ ಇದರಲ್ಲಿ ಅಡ್ರಿನಾಲಿನ್ ರಶ್ ಇಲ್ಲವೆನಿಸಿ ಪಿಚ್ಚೆನಿಸಿತು. ಕಮಟು ವಾಸನೆಯ axe ಮೂಸಿ ಅಭ್ಯಾಸವಾದವರಿಗೆ ಮಲ್ಲಿಗೆ ವಾಸನೆಯೇ!!
ಹಾಗೆ ಲಂಗುಲಗಾಮಿಲ್ಲದೆ ಅಲೆಯುತ್ತಿದ್ದಾಗಲೇ ಬಹಳದಿನಗಳಿಂದ ನೋಡಬಯಸಿದರೂ ಸತ್ಯ ಇದುರಿಸಲು ಹೆದರಿ ಅಥವಾ ಆಫ್ಟರ್ ಇಫೆಕ್ಟಿಗೋ , ಫೋಲ್ಡರ್ ಗಳೊಳಗೆ ಅವಿತಿದ್ದ into the wild ಶುರುಮಾಡಿದೆ.ಒಂಥರಾ ಭವಬಂಧಗಳ ಕಳಚುತ್ತಾ ಹಣ , ಕ್ರೆಡಿಟ್ ಕಾರ್ಡ್ ಎಲ್ಲಾ ಸುಟ್ಟು ಕೊರೆವ ಚಳಿಯಲ್ಲಿ ಸುಳ್ಳು ಬದುಕಿನ ಸುಳ್ಳನ್ನು ತೊರೆದು ಹೋಗುವ ಮೆಕೆಂಡ್ಲಿಸ್ ನ ಕತೆ.ನಿಜವಾದ ಘಟನೆ.
ಯಾಕೋ ಗೊತ್ತಿಲ್ಲ ಈ ಚಿತ್ರ ಚೆನ್ನಾಗಿದ್ದರೂ ನನ್ನೊಳಗೆ ಇಳಿಯಲಿಲ್ಲ.ಕಾರಣ ಗೊತ್ತು ಗುರಿಯಿಲ್ಲದೆ ಒಬ್ಬ ಅಲೆದಾಡಿ ಅನಾಥ ಶವವಾಗುವ ದುರಂತ.ಅಥವಾ  ನಮ್ಮ ಸಿನಿಮಾಗಳಂತೆ ಕತೆಗೊಂದು ಹೀರೋ ,ಹೀರೋಯಿನ್ ಬೇಕೇ ಎಂಬ ಮನಸ್ಥಿತಿ. ಸುಮ್ಮನೆ ಹೀಗೆ ಸಾಗಿದರೆ ಗುರಿಯಿಲ್ಲದೆ 'ಇದೆಂಥದ್ದಪ್ಪಾ, ಕರ್ಮ..' ಅನಿಸತೊಡಗಿ ಪಾರಾಗುವ ದಾರಿ ಅರಸುತ್ತದೆ.
ನನಗೆ ಅನಿಸಿದ್ದು ಈತ ಏಕೆ ಹಿಪ್ಪಿ ಸಂಸ್ಕತಿ ಅನುಸರಿಸಿಲ್ಲ ಅಂತ.ಬಹುಶ  ಅದರ ಏರುಕಾಲ ಕಳೆದು ಹೋಗಿತ್ತಾದ್ದರಿಂದ ಇರಬಹುದು.
ಏನಾದರೂ ಈ ಚಿತ್ರ ನನ್ನನ್ನ ತುಂಬ ದುಃಖಿತನನ್ನಾಗಿಸಿತು.ನಾವು ನೋಡುವ ಬಹುತೇಕ ಸಿನಿಮಾಗಳಲ್ಲಿ ಎಷ್ಟೇ ಕಷ್ಟ ಬಂದರೂ ಆಮೇಲೆ ಸರಿಯಾಗ್ತದೆ ಬಿಡು ಯಾಕೆಂದರೆ ಅವ ಹೀರೋ ಎಂಬ ಹೋಪ್ ಇರುತ್ತೆ.ಇದರಲ್ಲಿ  ಎದುರಿಸಲೇಬೇಕಾದ ಸೋಲು ಸಾವಿನ ರೂಪದಲ್ಲಿ ಕಾದು ಕೂತಿದೆ ಅದೂ ನಮಗೂ ಗೊತ್ತಿದೆ ಅನ್ನುವಾಗಿನ ವಿಷಾದ ಕೊರೆಯುತ್ತದೆ.
ಮರೀಚಿಕೆ ಸುಳ್ಳಾದರೂ ಹಿತವೇ, ಉರಿವ ಸತ್ಯಕಿಂತ!

ಪ್ರೇಮಾ ಕಾರಂತ ಆತ್ಮಕಥನ ' ಸೋಲಿಸಬೇಡ, ಗೆಲಿಸಯ್ಯಾ'

ಇತ್ತೀಚೆಗಷ್ಟೆ ಓದಿ ಮುಗಿಸಿದ ' ಪ್ರೇಮಾ ಕಾರಂತ'ರ ಆತ್ಮಕಥೆ ' ಸೋಲಿಸಬೇಡ ಗೆಲಿಸಯ್ಯಾ'  ರೋಮಾಂಚನಕಾರಿ ಪಯಣವಲ್ಲದೆ ಮನಸ ಕೊಳದೊಳಗೆ ಕಲ್ಲೆಸೆದಂತೆ ಅಲೆಗಳೆಬ್ಬಿಸುತ್ತಲೇ ಇತ್ತು.
ತಮ್ ಜೀವನ ಪಯಣದ ಅತ್ಯಂತ ವಿವಾದಾತ್ಮಕ ಘಟನೆಯಾದ ಕಾರಂತ ವಿಭಾ ಮಿಶ್ರ ಪ್ರಕರಣದಿಂದ ಕಥನ ಶುರು ಮಾಡುವ ಪ್ರೇಮಾ ಕಾರಂತರು ಇಡೀ ಪಯಣವನ್ನ ಹಿಮ್ಮುಖ ಮುಮ್ಮುಖವಾಗಿ ಸಾಗಿಸುವ ರೀತಿಯೇ ಅದಭುತ. ತನ್ನ ಓಡಾಟಗಳು, ನಾಟಕಗಳು, ವಿವಾದಗಳು, ಫಣಿಯಮ್ಮ ಚಲನಚಿತ್ರ ಮೂಡಿದ ಬಗೆ, ಸಂಕಷ್ಟದ , ಖುಷಿಯ(?) ಕಾಲ ಹೀಗೆ ವಿವರಗಳು ಕಣ್ಣಿಗೆ ಕಟ್ಟುವಂತೆ ನಿರೂಪಿಸುತ್ತಾ ಹೋಗುತ್ತಾರೆ.
ಆದರೆ ಕೆಲ ಪ್ರಶ್ನೆಗಳು ಉದಾಹರಣೆಗೆ ಇಡೀ ಕಥನದಲ್ಲಿ ಎಲ್ಲಿಯೂ ಸಂತಾನದ ಬಗ್ಗೆ, ಆ ಆಸೆಯ ಬಗ್ಗೆ ಹಾಗೆ ನಮ್ಮಂತಹ ಸಾಮಾನ್ಯರಿಗೆ ಮಹತ್ವದ್ದು ಅನಿಸಬಹುದಾದ ಸಂಗತಿಗಳ ಪ್ರಸ್ತಾವವೂ ಆಗುವುದಿಲ್ಲ; ಆ ಮಟ್ಟಿಗೆ ಇದೊಂಥರಾ ಸಾರ್ವಜನಿಕ ಕಥನವಾಗುತ್ತದೆ.
ಇನ್ನು ಅವರ ಆತ್ಮಕಥೆಯಾಗಿರುವುದರಿಂದ ಅವರ ನಿಲುವುಗಳು ಢಾಳಾಗೇ ಕಾಣುತ್ತವೆ ನಮಗೆ ಒಪ್ಪಿಗೆಯಾಗದಿದ್ದರೂ.
ಹಾಗೆಯೇ ಇದು ಆ ಕಾಲದ ಸಾಂಸ್ಕ್ರತಿಕ ಪಲ್ಲಟಗಳ ದಾಖಲೆ ಕೂಡಾ,
ಪುಸ್ತಕ ಓದಿ ಮುಗಿಸಿದರೂ ಪ್ರೇಮಾ ಕಾರಂತರು ಕಾಡುತ್ತಾರೆ ಮತ್ತು  ಆ ಮೂಲಕ  ಗೆಲ್ಲುತ್ತಾರೆ!

ಬೊಜ್ಜು

ಹೀಗೆ ತೋರ ಕಾಣುವ
ಹೊಟ್ಟೆಯನ್ನೂ,
ಶರ್ಟ್ ಮಡಿಸುವಂತೆ ಮಡಿಸಿ
ಇನ್ ಮಾಡುವಂತಿದ್ದರೆ;
ಒಂಚೂರು ದೂರಕ್ಕೂ  'ಉಸ್ಸಪ್ಪ',
ಈಗಷ್ಟೇ ಹೊಟ್ಟೆ ತುಂಬ ತಿಂದು
ರಾತ್ರಿ ಏನೂ ಬೇಡಾ ಅಂದರೂ,
ಹಗಲು ಮಗುಚಿ ಇರುಳ
ಪುಟ ತೆರೆದಂತೆ,
'ಅಬ್ಬಬ್ಬಾ' ತಾಳಲಾರದೆ,
ಇನ್ನು, ಇನ್ನಷ್ಟು;
ಒಂದು ಗಂಟೆ ವಾಕು, ಅರ್ಧ ಗಂಟೆ ಯೋಗ,
ಒಂಚೂರು ನಿಂಬೆ ರಸಕ್ಕೆ ಜೇನು,
ಬೇಡವಾದರೆ
ಬೇವಿನಸೊಪ್ಪು;
ಮರೆತೀರಾ ಖಾಲಿ ಹೊಟ್ಟೆಗೆ!

ಎರಡು ದಿನ, ತಪ್ಪಿದರೆ ಮೂರು,
ಮತ್ತೆ ಮೊದಲಿನಂತೆ,
ಯಾರು ಏಳ್ತಾರೆ ಅಷ್ಟು ಬೇಗ?
ಸ್ವಲ್ಪ ಅತ್ತಿತ್ತ ಆದರೂ ಗ್ಯಾಸು;
ಕಲ್ಲೇ ತಿಂದರೂ ಲಟ್ಟಕನಿರುವ ಹಳಬರು,
ಐ ಆ್ಯಮ್ ವಾಚಿಂಗ್ ಮೈ ಫಿಗರ್ ಹೊಸಬರು,
ಕನಸಲೂ ಸಿಕ್ಸು ಪ್ಯಾಕು,
ಗೂಗಲ್ ತುಂಬಾ ಏಳೇ ದಿನದಲ್ಲಿ
ಹತ್ತು ಕೆ.ಜಿ. ಖಾಲಿ
ಜಾಹೀರಾತು,
ನಿನ್ನೆಯ ಫೋಟೋಗಳ ತುಂಬಾ
ಆಪ್ಯಾಯಮಾನ ನಿಟ್ಟುಸಿರು;
ಕೈ ಮತ್ತೆ ಪ್ಲೇಟಿನೆಡೆಗೇ,
ಯಾರು ಬದುಕಿದ್ದಾರೆ ಸಾವಿರ ವರ್ಷ??
ಇದು ಮುಗಿದರೆ ಮತ್ತೆ ಮುಟ್ಟಲ್ಲ ದೇವರಾಣೆ;
ಟೈರು ಸವೆಯುವ ಆಸೆಗೆಲ್ಲಿದೆ ಕೊನೆ!!