ಬೊಜ್ಜು

ಹೀಗೆ ತೋರ ಕಾಣುವ
ಹೊಟ್ಟೆಯನ್ನೂ,
ಶರ್ಟ್ ಮಡಿಸುವಂತೆ ಮಡಿಸಿ
ಇನ್ ಮಾಡುವಂತಿದ್ದರೆ;
ಒಂಚೂರು ದೂರಕ್ಕೂ  'ಉಸ್ಸಪ್ಪ',
ಈಗಷ್ಟೇ ಹೊಟ್ಟೆ ತುಂಬ ತಿಂದು
ರಾತ್ರಿ ಏನೂ ಬೇಡಾ ಅಂದರೂ,
ಹಗಲು ಮಗುಚಿ ಇರುಳ
ಪುಟ ತೆರೆದಂತೆ,
'ಅಬ್ಬಬ್ಬಾ' ತಾಳಲಾರದೆ,
ಇನ್ನು, ಇನ್ನಷ್ಟು;
ಒಂದು ಗಂಟೆ ವಾಕು, ಅರ್ಧ ಗಂಟೆ ಯೋಗ,
ಒಂಚೂರು ನಿಂಬೆ ರಸಕ್ಕೆ ಜೇನು,
ಬೇಡವಾದರೆ
ಬೇವಿನಸೊಪ್ಪು;
ಮರೆತೀರಾ ಖಾಲಿ ಹೊಟ್ಟೆಗೆ!

ಎರಡು ದಿನ, ತಪ್ಪಿದರೆ ಮೂರು,
ಮತ್ತೆ ಮೊದಲಿನಂತೆ,
ಯಾರು ಏಳ್ತಾರೆ ಅಷ್ಟು ಬೇಗ?
ಸ್ವಲ್ಪ ಅತ್ತಿತ್ತ ಆದರೂ ಗ್ಯಾಸು;
ಕಲ್ಲೇ ತಿಂದರೂ ಲಟ್ಟಕನಿರುವ ಹಳಬರು,
ಐ ಆ್ಯಮ್ ವಾಚಿಂಗ್ ಮೈ ಫಿಗರ್ ಹೊಸಬರು,
ಕನಸಲೂ ಸಿಕ್ಸು ಪ್ಯಾಕು,
ಗೂಗಲ್ ತುಂಬಾ ಏಳೇ ದಿನದಲ್ಲಿ
ಹತ್ತು ಕೆ.ಜಿ. ಖಾಲಿ
ಜಾಹೀರಾತು,
ನಿನ್ನೆಯ ಫೋಟೋಗಳ ತುಂಬಾ
ಆಪ್ಯಾಯಮಾನ ನಿಟ್ಟುಸಿರು;
ಕೈ ಮತ್ತೆ ಪ್ಲೇಟಿನೆಡೆಗೇ,
ಯಾರು ಬದುಕಿದ್ದಾರೆ ಸಾವಿರ ವರ್ಷ??
ಇದು ಮುಗಿದರೆ ಮತ್ತೆ ಮುಟ್ಟಲ್ಲ ದೇವರಾಣೆ;
ಟೈರು ಸವೆಯುವ ಆಸೆಗೆಲ್ಲಿದೆ ಕೊನೆ!!