Wednesday, November 5, 2014

ಡಲ್ಲಾಸ್ ಬೈಯರ್ಸ್ ಕ್ಲಬ್:ಸಾವೆಂಬ ಕುದುರೆಯ ಮೇಲಿನ ಪಯಣ

ಅದು ೧೯೮೫ರ ಸಮಯ. ಡಲ್ಲಾಸ್ ನ ಇಲೆಕ್ಟ್ರೀಷಿಯನ್ ರಾನ್ ವುಡ್ ರೂಫ಼್ ತನ್ನ ಎಂದಿನ ಹ್ಯಾಪಿ ಗೋ ಲಕ್ಕಿ ಜೀವನದ, ಗೂಳಿ ಕಾಳಗ, ಸ್ವಚ್ಚಂಧ ಕಾಮದಲ್ಲಿ ಮುಳುಗಿ ತೇಲುತ್ತಿರುವಾಗ, ಅನಾರೋಗ್ಯಕ್ಕೆಂದು ಪರೀಕ್ಷೆಗೊಳಪಟ್ಟವನಿಗೆ ತಾನು ಹೆಚ್.ಐ.ವಿ. ಪಾಸಿಟಿವ್ ಎಂದು ತಿಳಿಯುತ್ತದೆ. ಡಾಕ್ಟರ್ ಅವನಿಗೆ ಬದುಕಿರಲು ಮೂವತ್ತು ದಿನದ ಗಡುವು ನೀಡುತ್ತಾರೆ. ಆರಂಭದಲ್ಲಿ ಅವನಿಗೆ ಒಪ್ಪಿಕೊಳ್ಳಲು ಸಾಧ್ಯವೇ ಆಗುವುದಿಲ್ಲ. ಕುಟುಂಬ,ಗೆಳೆಯರು ಎಲ್ಲಾ ದೂರ ಸರಿದು, ಇದ್ದ ಕೆಲಸವನ್ನೂ ಕಳಕೊಂಡು,ಮನೆಯಿಂದ ಹೊರಹಾಕಲ್ಪಟ್ಟವನಿಗೆ, ಆಸ್ಪತ್ರೆಯ ಡಾಕ್ಟರ್ ಇವ್ ಸಾಕ್ಸ್ ಹೊಸದಾಗಿ ಆಗ ಪರೀಕ್ಷೆ ಮಾಡುತ್ತಿದ್ದ ಡ್ರಗ್ ಎ.ಜ಼ೆ.ಟಿ. ಪರಿಚಯಿಸುತ್ತಾಳೆ. ಆದರೆ ಅವನ ಸ್ಥಿತಿ ಬಹಳ ಗಂಭೀರವಿದ್ದದರಿಂದ ಅವನಿಗೆ ಕೊಡಲು ನಿರಾಕರಿಸುತ್ತಾಳೆ.ಆಸ್ಪತ್ರೆಯ ನರ್ಸ್ ಒಬ್ಬನನ್ನು ಓಲೈಸಿಕೊಂಡು ತನಗೆ ಆ ಡ್ರಗ್ ತರಿಸಿಕೊಳ್ಳುವ ರಾನ್ ನ ಆರೋಗ್ಯ ಹದೆಗೆಡುತ್ತದೆ. ಆಸ್ಪತ್ರೆಯಲ್ಲೇ ಅವನಿಗೆ ರಯೋನ್ ಎಂಬ ಉಭಯಲಿಂಗಿಯ ಪರಿಚಯವಾಗುತ್ತದೆ. ತನ್ನ ಬಳಿಯ ಮಾತ್ರೆಗಳ ಸ್ಟಾಕ್ ಮುಗಿದ ಬಳಿಕ ಇನ್ನೂ ಅದನ್ನು ಪಡೆಯಲು ಮೆಕ್ಸಿಕೋ ಗೆ ಹೋಗಿ ಡಾಕ್ಟರ್ ವಾಸ್ ಎಂಬವರ ಭೇಟಿ ಮಾಡುವ ರಾನ್ ಗೆ ತಾನು ಬಳಸುವ ಡ್ರಗ್ ನ ಸೈಡ್ ಇಫ಼ೆಕ್ಟ್ ಗೊತ್ತಾಗಿ ಆಘಾತವಾಗುತ್ತದೆ.
ಡಾಕ್ಟರ್ ವಾಸ್ ಅವನಿಗೆ ಡಿ.ಡಿ.ಸಿ. ಮತ್ತು ಪೆಪ್ಟೈಡ್.ಟಿ. ಕೊಡುತ್ತಾರೆ. ಅದು ಅಮೇರಿಕದಲ್ಲಿ ಎಫ಼್.ಡಿ.ಎ. ಅನುಮತಿ ಪಡೆಯದ್ದರಿಂದ ಅದನ್ನು ಕದ್ದು ಸಾಗಿಸುವ ಕೆಲಸಕ್ಕೆ ಕೈ ಹಾಕುವ ರಾನ್, ಅಮೇರಿಕದ ಬೀದಿಯಲ್ಲಿ ಅದರ ಮಾರಾಟಕ್ಕೆ ಇಳಿಯುತ್ತಾನೆ.ಅವನೊಂದಿಗೆ ಉಭಯಲಿಂಗಿ ರೊಯನ್ ಜೊತೆ ಸೇರುತ್ತಾನೆ. ಇತ್ತ ಆಸ್ಪತ್ರೆಯಲ್ಲಿ ಎ.ಜ಼ೆ.ಟಿ.ಯ ಅಡ್ಡ ಪರಿಣಾಮಗಳ ಅರಿವಿದ್ದರೂ ತನ್ನ ಮೇಲಾಧಿಕಾರಿ ಡಾಕ್ಟರ್ ಸೆವರ್ಡ್ ನ ಆಣತಿಯಂತೆ ಇವ ಸಾಕಿನ್ಸ್ ತನ್ನ ರೋಗಿಗಳಿಗೆ ಅದನ್ನು ಕೊಡುವುದನ್ನು ಮುಂದುವರೆಸುತ್ತಾಳೆ.
ತನ್ನ ಆರೋಗ್ಯದಲ್ಲಿ ಸುಧಾರಣೆ ಕಂಡು ಬಂದದ್ದರಿಂದ ರಾನ್ ,ತನ್ನ ಮದ್ದನ್ನು ಹೊರದೇಶದಿಂದ ತಂದು, ಅಮೇರಿಕದಲ್ಲಿ ಮಾರಾಟ ಮಾಡುವ ವಹಿವಾಟಿಗೆ ಕೈ ಹಾಕುತ್ತಾನೆ. ೪೦೦ ಡಾಲರ್ ಕೊಟ್ಟು ಸದಸ್ಯನಾಗುವ ಅವನ 'ಡಲ್ಲಾಸ್ ಬೈಯರ್ಸ್ ಕ್ಲಬ್' ಜನಪ್ರಿಯವಾಗುತ್ತದೆ. ಆದರೆ ಆಸ್ಪತ್ರೆಯ ಮತ್ತು ಡ್ರಗ್ ಕಂಟ್ರೋಲ್ ಬೋರ್ಡ್ ನ ಕಾಕ ದೃಷ್ಟಿ ಅವನ ಮೇಲೆ ಬಿದ್ದು, ಹೊಸ ಕಾನೂನು ಬೇರೆ ಜಾರಿಗೆ ಬಂದು ಅವನ ವಹಿವಾಟಿಗೆ ಹೊಡೆತ ಬೀಳುತ್ತದೆ. ಅವನ ಉಭಯಲಿಂಗಿ ಗೆಳೆಯನ ಸಾವು ಅವನನ್ನ ಜರ್ಝರಿತನನ್ನಾಗಿಸುತ್ತದೆ. ಹಣ ಮಾಡುವ ಉದ್ದೇಶ ಹಿಂದೆ ಸರಿದು , ಸಾಧ್ಯವಾದಷ್ಟು ಹೆ.ಐ.ವಿ. ಪೀಡಿತರಿಗೆ ಸಹಾಯ ಮಾಡಲು ಶುರು ಮಾಡುತ್ತಾನೆ. ೧೯೮೭ ರಲ್ಲಿ ಎಫ಼್.ಡಿ.ಎ ಮೇಲೆ ಕೇಸು ಹಾಕಿ ಗೆಲ್ಲುತ್ತಾನೆ.
ತನಗೆ ಹೆ.ಐ.ವಿ. ಪತ್ತೆಯಾದ ಏಳು ವರ್ಷಗಳ ನಂತರ ೧೯೯೨ ಸಾವನ್ನಪ್ಪುತ್ತಾನೆ. ಇದಿಷ್ಟು ಜೀನ್ ಮಾರ್ಕ್ ವಾಲ್ಲಿ ನಿರ್ದೇಶಿಸಿದ ೨೦೧೩ ರಲ್ಲಿ ಬಿಡಿಗಡೆಯಾದ ' ಡಲ್ಲಾಸ್ ಬಯರ್ಸ್ ಕ್ಲಬ್' ನ ಸ್ಥೂಲ ಕತೆ.
ಆದರೆ ಇಷ್ಟೇನೇ?
ಮುಖ್ಯ ಪಾತ್ರದಲ್ಲಿ ನಟಿಸಿದ ಮ್ಯಾತ್ಯೂ ಮೆಕ್ ಕಾನಗೆ ಯ ಅಭಿನಯವಂತೂ ಅಧ್ಭುತ. ಆವರ ಪಾತ್ರವಾದ ರಾನ ನ ವಿಲಾಸಿ ಜೀವನ, ರೋಗ ದೃಡಪಟ್ಟ ಮೇಲಿನ ಯಾತನೆ, ಮನುಷ್ಯ ಸಂಬಂಧಗಳು, ಹತಾಶೆ, ಹಪಾಹಪಿ, ಖುಷಿ ಹೀಗೆ ಹಲವು ಭಾವಗಳ ಸಮ್ಮಿಶ್ರಣದ ಈ ಪಾತ್ರಕ್ಕೆ ಅರ್ಹವಾಗೇ ಅತ್ಯುತ್ತಮ ನಟ, ಉಭಯಲಿಂಗಿಯ ರೊಯನ್ ಪಾತ್ರದಲ್ಲಿ ನಟಿಸಿದ  ಜರೆಡ್ ಲೆಟೊ ಗೆ ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿ ದೊರೆಯಿತು.
೮೦ ರ ದಶಕದಲ್ಲಿ ಆಗಿನ್ನು ಹೆ.ಐ.ವಿ. ಪೀಡಿತರಿಗೆ ದೊರೆಯುತ್ತಿದ್ದ ಸಾಮಾಜಿಕ ಅಸ್ಪೃಶ್ಯ ಅನಾದರ, ನಾಗರೀಕ ಸಮಾಜ ಸಲಿಂಗ ಕಾಮಿಗಳ ನಡೆಸುತ್ತಿದ್ದ ರೀತಿ ಹೀಗೆ ಹಲ ಕೆಲವು ಚಿತ್ರಗಳ ಮೂಲಕ ತಟ್ಟುವ ಈ ಸಿನಿಮಾ ಮತ್ತೆ ನೋಡಲೇ ಬೇಕಾದ್ದಾಗಿ ಹಾರ್ಡ್ ಡಿಸ್ಕಲ್ಲಿ ತನ್ನನ್ನು ಸೇವ್ ಮಾಡಿಕೊಂಡಿತು.