ಅವಸ್ಥೆ

ನಮ್ಮ ಪಾಡಿಗೆ ನಾವು
ಅದೇ ವೃತ್ತದ ಪರಿಧಿಯಲ್ಲಿ;
ಬೆಳಗ್ಗೆ ಅಲರಾಮ್ ಸದ್ದು,
ದೋಸೆಯ ಚುಯ್;
ಮಕ್ಕಳ ಶಾಲೆಯ ವ್ಯಾನು,
ಹೊತ್ತೇರಿದಂತೆ
ಮಧ್ಯಾಹ್ನದ ಅಡಿಗೆಯ ಚಿಂತೆ,
ಊಟವಾದ ಮೇಲೆ ಕೋಳಿ ನಿದ್ದೆ;
ಸಂಜೆಯ ಚಾ,
ರಾತ್ರಿಯ ಸೀರಿಯಲ್ಲು,
ಎಣಿಸಿ ತಪ್ಪಿದ ಸೆಕ್ಸು,
ಆಮೇಲಿನ ಮಂಪರು
ಎಲ್ಲ ದಿನ ಹೀಗೇ ಅಲ್ಲ:
ಯಾವುದೋ ಹಾಡು
ಎದ್ದಾಗಿಂದ ಕಾಡಿ,
ನೆನಪು ಸುರುಳಿಯಾಗಿ ಅಂಗಾತ ಬಿದ್ದು,
ಪಲ್ಲವಿಯೇ ಸಾಲಾಗಿ
ದಾರಿ ತಪ್ಪಿದ ದೈನೇಸಿ;
ಇದೆಲ್ಲದರ ಅರ್ಥವೇನು?
ಕೊಂಚ ಚಿಂತೆ
ಉತ್ತರ ಹೊಳೆಯುವ ಮೊದಲೇ
ಮತ್ತೆ ಓಟ,
ತಂಪಾದ ಕ್ಷಣಗಳ ಆಯುಸ್ಸು
ತುಂಬಾ ಕಮ್ಮಿ!